VIDEO

Giovanni Carlo Cattagni

Penser d’un pensiunà paves

Ogni tant am vegna da pensà
so fat in d’la me vita
e, ringrasiand al ciel,
sa’m resta ummò da fà.

Tame’in dun cine un po sculurì
am pasa in dla me ment
la storia d’la me vita:
…la vèdi dì par dì.

A cumincià dai Suor d’l’asilo Gandini
indè co imparà
a pregà, a giugà
e fa ast e puntini.

Al num d’la me Suora l’era Luigia,
ler sempar li, sin a la sira,
quand gniva la me mama
a quatam su e purtam via.

Dl’asilo e di Suor go un ricordi bel ciar
parchè anca me surela Emilia
ler li anca le al Gandini,
ma a scola, in di elementar.

Mi stavi ind’un palasi a metà ad via Volta,
la ca l’er neta e signorile:
gher anca al purtinar,
me s’usava una volta.

Am ricordi al curtil cun i so sas e un bel scalon,
un cancel cun dre l’urtaia,
e la vus d’la purtinara:
“gioga no cun al balon”.

Finì l’asil di Suor, par ves arenta a cà,
i man mandà al De Amicis:
cun al blusin bel negar
seri al padron d’la strà.

La maestra d’la prima l’er propi una madama,
l’er brava e gentil,
la gaviva pasiensa,
pariva un’altra mama.

In tersa elementar g’an cambià la maestra:
quand um vist cl’era un om,
uma al volo capì
cler cambià la minestra !

Finì i elementar, ecco ca spunta ummò al Gandini,
….man mandà a fa i medi
al Pascal, ..i tri rastè,
la scola in curs Masini.

Ien stai tri an che ades am paran set,
cun l’italian, la storia,
…. c’la bestia dal latin
ed una cavalà ...ad tanti sgarsulet !

E dopu, par diventà perito, ho decis da studià.
Studiavi a suficiensa,
preferivi andà in gir

cun tanti bei fiulet, par tuta la cità.

A la fin, a vint’an, al diploma ad perito l’è rivà;
e dopu quatar dì,
pien ad sudisfasion,
al me prim laur l’ho propi incumincià.

Da alura tut l’è vulà, püsè rapid d’un pivion,
Paves, American, Ingles,
quarant’an ad girà,
par vèd a la fin e finalment …la pension.

Ringrasiand al Signur e riturnand alla prima quartina
mi speri cun al cör,
da pudè, fra un quei an,
scriv ummò una quei riga, …..massim una ventina!