opere vernacolari personaggi

Mi presento : Eustachi Pasino
propi mì, al Re dal Ticino
sempr' in gir cul barcé fin da fiö
mama lavandera e padàr barchirö.

Nuove chiese, darsene e ponti
ma a Pavia, cumandava il Visconti
giàmò alura par fà quadrà i mes
s'à sgubàva suta i Milaneš.

I m' hän fàt fà al 'navarö'
al marinàr d'acqua dulša d'incö
e sparà cun bumbàrd e canón
Canal sempar püsè marón.

Cun la guèra dumà dispiasè
äncä al Duca 'g-n avìva un pò a sè
e l'è insì ch'äl ma ciama un bel dì

ed “comanderai tu la mia flotta” e l'è partì.

Propi mì che la guèra ... nänca cui pès !!
äm piašiva guardài setà int' la riva 'me adèss
ch'a sum veg, siur e senša tribülašión
ma int'i urèg senti ummo i bumbàrd e i canón.

Propi mi che la guèra ... nänca parlàn
mi che al mašim andàvi a tanà o par ràn
'dèss g'ho tüt ma g'la fò pü a guardà
l'acqua sensa vèd no dentr' i mè suldà.

Venezia, la nostra nemica
s'i gnivàn giù l'era no pr' una gita
pär fà no propi la fìn dal ràtt
un quèi coss bisugnàva inventàs.

Ho fàt a mént al mè barcé
il fondo piatto cun taijà 'l dadré
ho vursù i mè nav fat insì
'iuma rängià sü e dopu sum partì.

E giù bòt ai Venešiän !!
äncä al Duca l'è gnì a batam i män
ma dimm tì pö m' as fà a vés cuntent
se i caduti jèn dumila e trasent.

Propi mì che la guèra ... nänca cui pès !!
äm piašiva guardài setà int' la riva 'me adèss
ch'a sum veg, siur e senša tribülašión
ma int'i urèg senti ummo i bumbàrd e i canón.

Propi mi che la guèra ... nänca parlàn
mi che al mašim andàvi a tanà o par ràn
'dèss g'ho tüt ma g'la fò pü a guardà
l'acqua sensa vèd no dentr' i mè suldà.

Se passate in Via Eustachi Pasino
ricurdèv dal Re dal Ticino
il potere, la gloria, i danè
pär la storia dal mè barcé.