Pina Trentani  -   da  "Pavia dal mè coer"

CUN VIALTAR !

 

L'è bèll vèss chi cun vialtr'in cumpagnìa,

sentiss cuntent, paves, in armunia

e cüntà sü dal temp urmai passà

par fa riviv üsans ch' ièn giübilà.

 

Ricordi ca mangiavi ingüri a fètt

setà giù foera 'd porta, in si banchètt,

gh'era qual ch'al vusava : « Frèsca e bèla ! »

e l'organ al sunava a manuvèla.

 

L'acqua dal cup la gniva giù pian pian,

sensa bicer, bevivi cun la man

sentivi udur ad prà, udur ad menta,

vulava i lüsaroè, s'eri cuntenta.

 

Pavia dal mè coer ad voeri ben,

un ben ch'as poè no dì. da tan ch' l' è ben

e godi sa respiri al to respir,

anca sa pioeva o gh'è la nebia in gir.

 

Perlustri la città in lungh e in largh,

guardi da chi, da là e legi i targh,

rampeghi, cui pensier, insima ai tur

e'l temp al passa 'l porta via i ur.

 

Am pias fermam in piassa dal mercà

a sentì tanta gent a cüntratà :

chi parla di danè e chi d'afari

intant Brulètt e Dom fan da scenari.

 

Visiti i Cés, vo dentar par pregà,

miri scultür, culòon, antichità

altar lüsent, bèi sant, cunfessiunari

ch' han scultà tropp pecà s'ièn millenari.

 

Sto là impala ins l'argin dal Tesin,

l'acqua la cura incontra al so destin,

l'incanta cui misteri ad vita e 'd mort

intant ch'la spegia al ciel o russ o smort.

 

Adèss ca sum adré pr'andà in sumensa,

d'la mè città 'na poedi pü fa sensa ;

sum pavesa püssé dal pont quatà

parche l'è noev e mi sum stagiunà.

(Primo premio letterario organizzato

dalla Canottieri Colombo e dalla Provincia Pavese)