Ién des e des ?
ai vünd'zur sò al mè paes
Guardé un pò che bèl scherzet
ho mai vist una matina :
s’ eri li tranquill, bel chiét
sal canton d' la Cittadina,
quand guardand in sü vers piazza,
propi in mes d' la gent ca passa
vedi vün in bicicléta
senza freno né targhéta
cal ga dava a pedalà
al curiva c' mè un dasprà.
Al filava bei d'incant,
s'lera ben in mes d'la gent
quand par caso, un survegliant
cal passava in stu mument
al la ferma in sal canton
el ga fa cuntravension :
cara lü, c' l' abbia pazienza,
i mutiv ch' insi jen vari,
ad targhéta lü l' è senza
e poe l' marcia in sens contrari
donca mi, voei vess curtes
am cuntenti ad des e des.
Tütt tranquill e surident
l' tira foera al so taquin
par riscoed al pagament,
ma quael la, c' ler birichin
al fa mustra ad gnì a quéla
ma al sa franca sü in d'la séla,
egh risponda franch c' mè un scioop:
lù l' è brav, e fina tropp
anzi, al dis ch'jen des e des. . .
pr' i vünd' z ur sò al me paes
e furzand i dü pedal :
ciapal, Pipa ! slarga i al !
e la pél tütta al la droeva
a cur giù da Stradanoeva.
Agh la fata tant pulid
che la gent s' èn miss a rid
e povr om l' è resta là
cal pariva imbalsamà !
